مع تحديث iOS 18 مش هتقدر تغير أي قطعة من الايفون غير اما تكتب الآي كلاود الأول!!

حاليًا، نظام iOS 18 متاح في نسخته التجريبية الأخيرة (الـ RC أو Release Candidate) اللي موجهة بشكل أساسي للمطورين والمستخدمين اللي بيحبوا يجربوا مميزات النظام قبل نزوله الرسمي للجميع. ومن المميزات اللي تم تأكيد وجودها في التحديث الجديد ميزة اسمها “Activation Lock”. ولو بتسأل، الخاصية دي هتمنع أي حد من استبدال أي قطعة من جهاز آيفون لجهاز تاني!

الميزة دي تم الإعلان عنها لأول مرة في إبريل 2024، وآبل قالت إنها طورتها بناءً على طلب من الحكومة الأمريكية بسبب قضية مواطن أمريكي كان بيشتكي من بيع قطع الأيفون المسروق بتاعه في السوق السودا.

الميزة دي هتقفل كل القطع الداخلية بتاعت الآيفون الأصلي (زي البطارية، الكاميرا، الشاشة وغيرها) لحساب صاحب الموبايل الأصلي عن طريق Apple ID. يعني لو حد حاول يركب قطعة مستعملة في آيفون تاني، الجهاز هيطلب منك تدخل حساب iCloud ورمز المرور بتاع الآيفون اللي كانت القطعة موجودة فيه قبل كده. ولو ما دخلتش الحساب والرمز الصح، القطعة مش هتشتغل وهتفضل مقفولة.

الكلام ده اتأكد من مستخدمين كتير لنظام iOS 18 التجريبي اللي حاولوا يبدلوا قطع داخلية وواجهوا الرسالة اللي بتأكد إن القطعة مش هتشتغل غير بحساب Apple ID بتاعها.

الغريب بقى إن فيه حد جرب يضغط على زر Cancel وكمل استخدام القطعة من غير ما يدخل حساب Apple ID نهائيًا، ودي كانت مفاجأة! بس النظام حدد القطعة في الإعدادات إنها “غير معروفة”، ودي النقطة السلبية الوحيدة في الموضوع.