إمتى هيوصل تحديث اندرويد 15؟

لو مش متابع، جوجل من كام يوم نزلت كود نظام أندرويد 15 مفتوح المصدر (AOSP)، لكن الغريب إن لحد دلوقتي ما بعتتش النسخة المستقرة للموبايلات المؤهلة من بكسل، وده على عكس اللي متعودين عليه. فيه شائعات كتير كانت بتقول إن الشركة هتنزل التحديث الرسمي خلال الشهر ده، لكن دلوقتي بقى عندنا تاريخ محدد لوصول أندرويد 15 أخيرًا!

حسب تقرير جديد نزل امبارح على موقع Android Headlines، جوجل هتبدأ تبعت تحديث أندرويد 15 المستقر بنسخته النهائية يوم 15 أكتوبر 2024 الجاي. التقرير كمان بيقول إن جوجل ممكن تغير حاجات في النسخة المستقرة، خاصةً إن النسخة التجريبية اللي موجودة دلوقتي كان فيها شوية مشاكل وأخطاء في بعض وظائف النظام الأساسية، وده ممكن يكون السبب في التأخير اللي مش متعودين عليه.

ممكن تسأل: ليه التأخير مش معتاد؟! لأن جوجل كل سنة بتطلق نظام أندرويد الجديد مع الإعلان عن سلسلة موبايلات Pixel الجديدة. السنة دي بقى، الشركة أعلنت عن Pixel 9 في أغسطس اللي فات، ولحد دلوقتي ما نزلتش النسخة النهائية من أندرويد 15. رغم كده، جوجل كانت دايمًا بتكشف عن موبايلات بكسل الجديدة في أكتوبر كل سنة، يعني اللي اتغير غالبًا هو معاد الإعلان عن الموبايلات، مش النظام نفسه!

على أي حال، نظام أندرويد 15 الجديد من جوجل هيكون متاح لموبايلات Pixel 6 وما بعدها، ونأمل إن سبب التأخير يكون إن الشركة بتحاول تطلع النظام بأكبر قدر من الاستقرار ومن غير أخطاء.