فيسبوك طلع بيتجسس على المستخدمين فعلًا وبيسمع كل محادثاتهم!

كم مرة كنت بتتكلم مع حد في موضوع معين، وفجأة تلاقي فيسبوك مغرقك إعلانات عن نفس الموضوع؟ وتبص انت والشخص اللي بتتكلم معاه لبعض وتقول: معقول يكون مارك سامعنا؟ بس المرة دي مش هنضحك ونعديها، لأن للأسف، طلع بيسمعنا بجد!

الموضوع ببساطة إن في تسريبات ظهرت بتكشف تورط شريك تسويقي لفيسبوك في التجسس على ميكروفونات تليفوناتنا عشان يطلعوا إعلانات للحاجات اللي بنتكلم عنها!
التقرير اللي جابه موقع 404media بيقول إن في مجموعة اسمها كوكس ميديا (CMG) بتستخدم برنامج اسمه الاستماع النشط Active Listening، البرنامج ده بيعتمد على الذكاء الاصطناعي عشان يسمع المحادثات ويحللها ويجمع منها بيانات في نفس اللحظة.

والمصيبة الأكبر إن المعلنين بيقدروا يجمعوا البيانات الصوتية دي مع البيانات السلوكية بتاعتنا زي طبيعة استخدامنا للمنصات، وبندوس على إيه، وبنشتري إيه أونلاين عشان يستهدفونا بإعلانات لحاجات معينة. والأدهى من كده إن فيسبوك وجوجل وأمازون كانوا من العملاء اللي بيستخدموا الخدمة دي! 😁

لما موقع 404media عرف القصة، سأل جوجل عن الشراكة دي، وجوجل على طول شالت مجموعة CMG من قائمة شركائها على مواقعها الرسمية. وفيسبوك قال إنه هيراجع علاقته مع CMG عشان يشوف لو كان في انتهاك لشروط الخدمة ولا لأ.
أما أمازون، فقالت إنها ما اشتغلتش مع CMG في البرنامج ده ومش ناوية تشتغل معاهم، وكمان المتحدث باسمهم أضاف إنهم هيتخذوا إجراءات لو أي شريك تسويقي خالف القواعد.

دي المرة الثالثة اللي بتظهر فيها تسريبات عن خدمات CMG في خلال سنة واحدة، وكلها بتدور حوالين توجيه الإعلانات باستخدام تقنيات الاستماع الصوتي.
في ديسمبر اللي فات، موقع 404media كشف عن ميزة الاستماع النشط، وقال إن CMG بتاخد 100 دولار في اليوم عشان تستهدف ناس في نطاق 10 أميال، و200 دولار عشان توسع النطاق لـ 20 ميل.

العجيب إن CMG كانت فخورة بخدماتها لدرجة إنها كانت بتعرضها على موقعها الإلكتروني بشكل علني قبل ما الناس تاخد بالها وتأرشف المقالات اللي بتتكلم عن البرنامج ده!