إصدار Samsung Galaxy S24 FE: المواصفات والسعر وكل اللي محتاج تعرفه

سلسلة Samsung Galaxy S معروفة جدًا بين مستخدمي أندرويد، والإصدارات الخاصة بالفانز أو النسخة الـ FE برضو محبوبة لعدة أسباب، زي إنها بتكون بأسعار معقولة. فيه تليفونات Galaxy FE معروفة زي Galaxy S21 FE وGalaxy S20 FE. والنسخة الجاية، Galaxy S24 FE، خلاص قربت تنزل.

فيه تسريبات كتير ظهرت الفترة اللي فاتت عن الموبايل ده، وإحنا جمعناهم لك في مكان واحد. هنا هتعرف كل حاجة عن تاريخ إصدار Galaxy S24 FE، والمواصفات، والسعر، وكمان حاجات تانية.

الموبايلات النسخة الفان إيديشن بتديك تجربة سلسلة Galaxy S المميزة بس بميزانية أقل. طبعًا المواصفات مش بتكون زي التليفونات الفخمة، بس بردو بتاخد موبايل قوي بسعر معقول.

سامسونج فوتت النسخة الفان إيديشن من Galaxy S22، لكن كملت السلسلة بعد كده بـ Galaxy S23 FE، وGalaxy S24 FE كمان قربت تنزل. المعلومات اللي هنا مبنية على تسريبات وتصميمات متوقعة. يلا بينا نعرف أكتر عن الموبايل الجديد من سامسونج.

تاريخ إصدار Samsung Galaxy S24 FE

سامسونج مكنتش دايمًا منتظمة في مواعيد إعلان النسخ الفان إيديشن. تم الإعلان عن Galaxy S20 FE في مارس 2021، وGalaxy S21 FE نزل في يناير 2022، وآخر نسخة جالاكسي S23 FE تم تقديمها في أكتوبر السنة اللي فاتت. زي ما انت شايف، مفيش موعد محدد لإطلاق النسخة دي.

بما إن فيه تسريبات كتير ظهرت مؤخرًا، ممكن النسخة الجديدة تنزل أسرع من المتوقع. احتمال كبير نشوف جالاكسي S24 FE قبل نهاية سبتمبر 2024. وكمان في صور ترويجية تسربت للجهاز، وده معناه إنه ممكن ينزل في خلال أسابيع قليلة.

سامسونج لسه ما أعلنتش رسميًا عن موعد الإطلاق، وممكن كمان ماتعلنش عنه قريب. ممكن ينزلوا الجهاز بشكل هادي من غير ضجة إعلامية زي ما حصل كذا مرة قبل كدة في أجهزة مختلفة.

تصميم Samsung Galaxy S24 FE

زي ما متعودين، موديل الـ FE بيكون مشابه للتليفونات الرئيسية من سلسلة الـ S، ونفس الكلام بينطبق على Galaxy S24 FE بناءً على التصميمات المتوقعة. ده معناه إن Galaxy S24 FE هيجي بتحسينات في التصميم شبه Galaxy S24 وS24 Plus.

أول حاجة، الإطار الألومنيوم بقى مسطح زي ما شوفنا في سلسلة Galaxy S24. والزوايا بقت أقل انحناء عن قبل كده. ممكن كمان تتوقع تحسينات في الحواف. Galaxy S24 FE اللي جاي هيكون متاح بخمس ألوان: جرافيت، أزرق، فضي/أبيض، أخضر، وأصفر.

في ثلاث كاميرات خلفية، كل واحدة منهم مفصولة ولها تصميم بارز ممكن بعض الناس ما يقدروش يحبوه، لأنه مش عملي لو حطيت الموبايل على ضهره على طرابيزة مثلا هتلاقيه مش ثابت وبيتحرك باستمرار. أما مكان الكاميرات الخلفية وبقية تفاصيل التصميم فهتبقىى زي ما كانوا في S23 FE.

ميزات سامسونج جالكسي S24 FE

الشاشة

المتوقع إن Galaxy S24 FE هيجي بشاشة بحجم 6.7 إنش بدقة Full HD+. زي ما كان في النسخة السابقة، Galaxy S24 FE هيدعم معدل تحديث يصل لحد 120Hz. ولإضاءة الشاشة، ممكن توصل لحد 1900nits، بس الإضاءة القصوى دي هتشتغل بس في الفيديوهات الـ HDR.

الشاشة في Galaxy S24 FE محمية بزجاج Gorilla Glass Victus+، وده ميزة كويسة.

المعالج، الرام، والذاكرة التخزينية

الموبايل المنتظر Galaxy S24 FE هيشتغل بمعالج Exynos 2400e. ممكن كتير من الناس يكونوا محبطين من الموضوع ده عشان أداء معالجات Exynos مش دايمًا أحسن حاجة، بس عموما نستنى أما نجربه ممكن يكون بقى كويس. كان ممكن سامسونج تضيف معالج Snapdragon بدلًا منه. الموبايل كمان متوقع ييجي بحد أقصى 12GB رام، وهتقدر تختار بين 128GB أو 256GB تخزين.

الكاميرا

زي ما شوفت في الصور اللي فاتت، هتكون فيه ثلاث كاميرات خلفية وكاميرا أمامية واحدة في الجهاز. الكاميرات الخلفية بتتكون من كاميرا رئيسية بدقة 50MP، وكاميرا أولترا وايد بدقة 12MP، وكاميرا تليفوتو بدقة 8MP مع زوم بصري 3x.

في الأمام، هتكون فيه كاميرا سيلفي بدقة 10MP. أداء الكاميرا في الجهاز هيفيد كمان من ميزات الذكاء الاصطناعي.

البطارية

موبايل  الجديدGalaxy S24 FE هييجي ببطارية سعة 4565mAh، وده هيديك أداء ممتاز. حسب الصور المسربة، البطارية هتدوم لحد 78 ساعة تشغيل موسيقى و29 ساعة تشغيل فيديو على شحنة واحدة. وكمان ممكن تعلي أداء البطارية أكتر اما تشغل شوية إعدادات توفير الطاقة.

محدش عارف سرعة الشحن، لكن متتوقعش عموما شحن سريع من سامسونج. سرعة الشحن من الحاجات اللي لازم سامسونج تحسنها بسرعة عشان تقدر تنافس في الوقت الحالي.

شوية مواصفات إضافية

• أندرويد 14 مع واجهة One UI 6.1.1
• مقاوم للماء
• ألوان: جرافيت، أزرق، فضي/أبيض، أخضر، وأصفر (مع لونين إضافيين حصريين على موقع سامسونج)

السعر المتوقع

لو مش عارف عن سلسلة الفان إيديشن، دي تليفونات متوسطة الأداء بتشارك تشابهات مع تليفونات سلسلة S الفخمة. حسب الشائعات، سعر Galaxy S24 FE هيكون حوالي 649 دولار للنسخة الأساسية.

طبعًا، السعر بالدولار حوالي 649 دولار. هنا الأسعار المقترحة بالعملات المحلية:

• مصر: تقريبًا 20,000 جنيه مصري
• السعودية: تقريبًا 2,435 ريال سعودي
• الإمارات: تقريبًا 2,380 درهم إماراتي
• قطر: تقريبًا 2,385 ريال قطري
• البحرين: تقريبًا 245 دينار بحريني

الأسعار دي تقديرية وممكن تختلف حسب الضرائب والتخفيضات والموزعين. زي المعتاد، المستخدمين هيستفيدوا من تخفيضات. فده كل اللي نعرفه عن Galaxy S24 FE لحد دلوقتي. الجهاز متوقع ينزل قريب. هنعمل تحديثات للمعلومات من وقت لآخر. إيه رأيك في Galaxy S24 FE الجاي؟ شاركنا رأيك في التعليقات.